Ўрта Чирчиқ тумани "Роватак" маҳалласида истиқомат қилувчи 22 ёшли Жамшид Эргашев бундан тўрт йил аввал 5 сотихли ерда иссиқхона ташкил этиб, яхшигина даромад топишни йўлга қўйган.

Бугунги кунда у иссиқхонадан йилига 4-5 маротаба ҳосил йиғиштириб олишга эришмоқда. Иссиқхонада ўтган йили кўкатлар, турп, карам, лавлаги, саримсоқ пиёз етиштирди.

 – Маҳсулотларим витаминларга бой бўлганлиги сабабли уларнинг бозори пандемия даврида чаққон бўлиб, ҳар бир ҳосилдан ўртача 6 миллиондан соф даромад олдим, – дейди Ж.Эргашев.

Жамшиднинг йилдан-йилга тажрибаси ошиб, 2 йилдан буён томчилаб суғориш усулини жорий қилди. Жамшид тадбиркорликда фақатгина иссиқхона билан чекланиб қолмасдан, уйида 2000 дона бедана ҳам боқади. Ҳар ойда бедана тухумларидан ҳам 5 миллион сўм соф фойда олмоқда.